PROGRAMA GALICONS.NET
PLANS PROXECTA
IES CELANOVA CELSO EMILIO FERREIRO
1.- INTRODUCIÓN
O IES Celanova é un centro
peculiar: habita un dos claustros dun mosteiro bieito do século XVIII, e iso
imprime carácter. Inscrito na campaña interdisciplinar posta en marcha pola
Biblioteca, bibliotecapoleiro.blogspot.com, "Voces de Muller",
decidímonos a participar en Galicons-net na modalidade "Consumo e
Xénero" por considerar que é un interesantísimo fío condutor de
actividades que conectarán a campaña coa realidade. Consumo e xénero son nichos
de desigualdade social: é urxente que a comunidade educativa tome conciencia de
que consumir con responsabilidade e criterio é a vía para unha sociedade máis
igualitaria e máis sostible.
Por outra banda, temos que ter en
conta que o noso centro é un centro rural, con sectores do alumnado que viven
en núcleos bastante illados, ás veces mal comunicados (por exemplo, o acceso a
internet é moi deficiente), con poucos
servizos (sen acceso próximo a bibliotecas, campos deportivos e mesmo
sanidade) e sempre tendo que desprazarse (algunhas liñas tardan máis dunha hora
en chegar ao instituto). Para todo o
alumnado pero para este en particular é vital a participación en proxectos que
lle permita desenvolverse, relacionarse e coñecer a realidade de primeira man.
E merece o mellor dos centros educativos onde aprender para a vida.
Por todo o mencionado, e como se
relatará a continuación, decidimos solicitar a participación neste
programa e tentaremos levar adiante o
noso proxecto realizando unha serie de actividades nas que estará implicada
toda a comunidade educativa, e que rematarán cun produto final que repercuta no
noso entorno: unha campaña de sensibilización.
2.- OBXECTIVOS
Os obxectivos que perseguimos coa nosa participación no
programa son os seguintes.
-Visibilizar os estereotipos de xénero a través dos
hábitos de consumo
-Previr acerca dos perigos da publicidade, os medios
audiovisuais, a música, etc., en canto á prevalencia do patriarcado
-Concienciar do camiño que queda por percorrer en favor
da igualdade
-Ser conscientes da manipulación dos medios sobre o noso
comportamento, e sobre a aceptación de estereotipos que en ambos casos nos
restan liberdade
-Fomentar hábitos de consumo saudables, tanto a nivel
persoal (alimentación, hixiene), como medioambiental (sostibles).
-Aprender, profesorado e alumnado, a traballar interdisciplinarmente
e en equipo, utilizando os medios ao
noso alcance e adquirindo as estratexias pertinentes da alfabetización
informacional.
3.- ORGANIZACIÓN,
DESENVOLVEMENTO E METODOLOXÍA
Tódalas actividades se realizarán
na hora de titoría e/ou a hora de lectura. Compre salientar que, por mor dos
horarios do transporte escolar, o noso centro ten semanalmente 33 horas
lectivas, así que esa "Hora 33" énchese cunha materia propia do
centro: Lectura, con horario fixo e profesor propio. Esta hora de lectura ten un fío temático
anual en correlación coa correspondente campaña da biblioteca, que este ano é
"Voces de Muller", polo que consideramos idónea a nosa participación
neste proxecto. Todo o alumnado do centro se verá dalgunha maneira implicado no
proxecto, pero se centrará sobre todo no alumnado da ESO. O alumnado de
bacharelato se incorporará nas actividades de xeito transversal.
Potenciaremos metodoloxías
activas e traballo en grupo, tanto en pequenas células cunha certa autonomía
como en gran grupo, segundo a actividade, estando moi presentes as competencias
de Aprender a aprender, as Competencias sociais e cívicas, Dixitais e de
Sentido da iniciativa e espírito emprendedor.
Tendo en conta que o produto
final será a mencionada campaña de sensibilización, ao longo do ano dividiremos
o traballo en tres fases:
1.- Estado da cuestión: Coñecemento da realidade
(Primeiro trimestre e cecáis parte do segundo):
Estudo de campo sobre hábitos de consumo e ocio en
supermercados, diferentes comercios, locais de hostalaría, etc.
Enquisa de hábitos de consumo e ocio entre profesorado,
alumnado, país e nais e resto do entorno.
Análise de publicidade: audiovisual e impresa.
Análise de videoclips e textos musicais.
Análise de obras literarias.
Análise de prensa.
Posta en marcha do blog.
2.- Estado da cuestión: Ampliación de información
(Segundo trimestre).
Busca de material xa elaborado por especialistas sobre o
tema: estudos de consumo, estatísticas, etc. A coordinadora realizará o curso
de formación específico “Consumo e xénero” na plataforma PLATEGA que aportará
máis luz sobre o tema.
Ademais durante esta fase elaborarase un lema para a
campaña, posible merchandising, deseños gráficos, etc.
Encontro con entidades do entorno, por exemplo a
Asociación de Amas de Casa Ilduara da nosa vila.
3.- Campaña de
sensibilización.
Realizarase seguindo o seguinte
esquema:
-Trazar a estratexia da campaña
tendo en conta toda a información previa obtida;
-Determinar o tipo de público ao
que vai dirixido;
-Programar o plan de publicidade
contando cos diferentes medios á nosa disposición: Internet (redes sociais,
blogs, etc.); documentos impresos, publicidade audiovisual, difusión dos lemas,
cartaces e posible merchandising, diferentes eventos sociais contando coas
entidades da mancomunidade, etc.
Durante todo o proxecto, os
diferentes grupos irán facéndose cargo e participando das diferentes áreas e
actividades do proceso, para non sobrecargar a ningún grupo.
En todo este proceso se involucrarán os seguintes
departamentos: Biblioteca, Lingua castelá, Lingua galega, Plástica, Tecnoloxía,
Música, Xeografía e Historia, Economía, Inglés, e posiblemente algún máis que
está por confirmar, así que a interdisciplinariedade está plenamente asegurada,
así como a referencia a tódolos elementos transversais.
4.- AVALIACIÓN
1.- Avaliación inicial: durante as primeiras tomas de
contacto co tema, as enquisas que se pasarán no primeiro trimestre servirán
para averiguar os coñecementos e opinións previos ao tema tratado non soamente
do alumnado, senón tamén do resto da comunidade educativa.
2.- Avaliación formativa: Darase conta de tódalas fases
do proceso mediante diarios de clase e follas de observación, así como un álbum
de proxecto no que se recollerá o proceso en imaxes, pudendo usar algunha
ferramenta como a plataforma Pinterest.. Toda a documentación partillarase no
blog e nas plataformas que consideremos oportunas (por exemplo na plataforma
Padlet).
3.- Avaliación final: Autoavaliación e coavaliación,
mediante enquisas de satisfacción do proxecto, así como avaliación grupal de
cada equipo de traballo.
A avaliación do produto final podería vir dada por
índices cuantitativos, por exemplo: repercusión nas redes (post compartidos,
retweets), entradas no blog, participación nos actos sociais da campaña, etc.
Comentarios
Publicar un comentario